Sut i baratoi ar gyfer arolygiad Estyn: Canllaw i ddarparwyr ôl-16
Yn Estyn, rydym yn ymrwymo i helpu darparwyr i wella ansawdd addysg a hyfforddiant, gan sicrhau deilliannau cadarnhaol i bob dysgwr yng Nghymru. Mae arolygiadau’n rhan annatod o’r broses hon, gan werthuso safonau cyfredol, nodi cryfderau ac amlygu meysydd lle gellir tyfu. Ein nod yw cynorthwyo darparwyr ar eu taith tuag at ragoriaeth.
Rydym yn deall y gall arolygiadau deimlo’n heriol o bryd i’w gilydd, ond maent wedi’u llunio i fod yn brofiad cydweithredol. Mae’n ein harolygwyr yma i weithio gyda chi ac nid ydym yn disgwyl perffeithrwydd. Yn hytrach, hoffem weld gwir adlewyrchiad o’ch arferion bob dydd a phrofiadau dysgwyr.
Yr hyn rydym yn edrych amdano yn ystod arolygiadau
- Wythnos arferol o weithgarwch: Hoffem arsylwi profiadau eich dysgwyr a staff o ddydd i ddydd. Cynlluniwch ar gyfer eich dosbarthiadau, sesiynau neu weithdai yn ôl yr arfer yn ystod yr arolygiad – does dim angen gorbaratoi.
- Arsylwadau yn y fan a’r lle: Mae ein harolygwyr yn canolbwyntio ar yr hyn sy’n digwydd mewn amser real ac yn gwrando’n weithredol ar eich dysgwyr i ddeall eu safbwyntiau.
- Amlygu cryfderau a meysydd i’w gwella: Mae arolygiadau’n gyfle i ddathlu’r hyn sy’n gweithio’n dda a nodi ffyrdd i wella profiad y dysgwr ymhellach.
Nid oes angen creu gwaith papur ychwanegol na dilyn dulliau addysgu neu asesu penodol. Yr hyn sydd bwysicaf yw sut mae’ch dulliau’n cefnogi cynnydd a datblygiad dysgwyr. Rydym yn chwilio am arferion dilys sy’n gwneud gwahaniaeth.
Barod yn Barod! ar gyfer arolygiad Estyn
Rydym yn credu bod darparwyr ledled Cymru eisoes yn barod ar gyfer arolygiad Estyn. Trwy ganolbwyntio ar ddarparu addysg a hyfforddiant o ansawdd uchel bob dydd, rydych chi’n dangos y parodrwydd rydym yn chwilio amdano.
Eisiau gweld sut olwg sydd ar arolygiad Estyn, mewn gwirionedd? Gwyliwch y fideos hyn gan Goleg Caerdydd a’r Fro a Grŵp Llandrillo Menai i gael adlewyrchiad gonest o’r broses:
I ddysgu mwy am sut rydych chi’n Barod yn Barod! ar gyfer arolygiad Estyn, ewch i dudalen yr ymgyrch yma: